༄༅། །ཡོ་ཧ་ནན་ལ་མངོན་པར་མཛད་པ་བཞུགས་སོ། །
ལེའུ་དང་པོ།
ངོ་སྤྲོད་ཞུ་བ།
1 ཡེ་ཤུ ་མཱ་ཤི་ཀ ་ཡིས་རང་གི་ཞབས་ཕྱི་རྣམས་ལ་རིང་པོར་མ་ལོན་པར་གང་འབྱུང་དགོས་པ་དེ་སྟོན་པའི་ཕྱིར།
དཀོན་མཆོག ་གིས་ཡེ་ཤུ་ལ་མངོན་པར་མཛད་པ་འདི་གནང༌།
ཡེ་ཤུས་རང་ཉིད་ཀྱི་ཕོ་ཉ་བརྒྱུད་ཁོང་གི་ཞབས་ཕྱི་ཡོ་ཧ་ནན ་གྱི་རྩར་བཏང་གནང་བའི་སྒོ་ནས་མངོན་པར་མཛད།
2 ཡོ་ཧ་ནན་གྱིས་དཀོན་མཆོག་གི་བཀའ ་དང་ཡེ་ཤུ་མཱ་ཤི་ཀས་དཔང་པོ་མཛད་པ།
རང་གིས་གང་མཐོང་བ་ཐམས་ཅད་ལ་བདེན་དཔང་བྱས།
3 དུས་འདི་སླེབས་ལ་ཉེ་བས།
ལུང་བསྟན་འདི་ཀློག་པ་དང་ཐོས་ཏེ།
དེའི་ནང་ལ་གང་བྲིས་པ་བཞིན་སྲུང་མཁན་རྣམས་བདེ་བ་ཡིན་ནོ། །
4 ང་ཡོ་ཧ་ནན་གྱིས་ཨེ་ཞེ་ཡཱ ་ཞིང་ཆེན་ལ་ཡོད་པའི་ཆོས་ཚོགས་བདུན་པོ་ལ་འཕྲིན་ཡིག་འདི་ཕུལ་ལོ།
ད་ལྟ་བཞུགས་པ་དང༌།
སྔར་ཡོད་པ་དང༌།
རྗེས་སུ་འབྱོན་པར་འགྱུར་བ་ཁོང་དང༌།
ཁོང་གི་བཞུགས་ཁྲིའི་དྲུང་དུ་ཡོད་པའི་ཐུགས་ཉིད་བདུན་པོ་དང༌།
5 བདེན་དཔང་མཛད་མཁན།
གཤིན་པོ་རྣམས་ཀྱི་སྔོན་དུ་འཁྲུང་པ།
འཇིག་རྟེན་རྒྱལ་པོ་རྣམས་ཀྱི་དབང་སྒྱུར་མཁན་སྟེ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ཚོ་ལ་འཐོབ་པར་གྱུར་ཅིག
ངེད་རྣམས་ལ་བྱམས་ཤིང༌།
ཉིད་ཀྱི་སྐུ་ཁྲག་གིས་ང་ཚོ་སྡིག་ཉེས ་ལས་བསྒྲལ་ཏེ།
6 ང་ཚོ་ཁོང་གི་ཡབ་དཀོན་མཆོག་ལ་ཞབས་ཏོག་སྒྲུབ་པའི་མཆོད་དཔོན་གྱི་རྒྱལ་འབངས་སུ་མཛད་མཁན་ཁོང་དུས་རྒྱུན་དུ་གཟི་བརྗིད་མངའ་ཐང་དང་ལྡན་པར་གྱུར་ཅིག
ཨ་མེན །
7 ལྟོས་ཤིག
སྤྲིན་དང་བཅས་ཏེ་ཁོང་ཉིད་མཁའ་ལས་འབྱོན། །
ཁོང་ལ་མདུང་བཙུགས་མི་ངན་དག་དང་ནི། །
སྐྱེ་འགྲོ་ཀུན་གྱིས་དེ་ལྟར་མཐོང་བར་འགྱུར། །
རིགས་ཀུན་ཁོང་གི་དོན་དུ་སྨྲེ་སྔགས་འདོན། །
གཏམ་འདི་བདེན་ནོ།
ཨ་མེན།
8 གཙོ་བོ་དཀོན་མཆོག ་གིས་“ང་ནི་ཨལ་ཕཱ་དང་ཨོ་མེ་གཱ ་སྟེ་ཐོག་མ་དང་མཐའ་མ་ཡིན་ལ།
ད་ལྟ་བཞུགས་པ་དང༌།
སྔར་ཡོད་པ་དང༌།
རྗེས་སུ་འབྱོན་པར་འགྱུར་བའི་དབང་ཀུན་དང་ལྡན་པ་དེའོ་”ཞེས་གསུངས་སོ། །
ཡོ་ཧ་ནན་ལ་མཱ་ཤི་ཀའི་ཞལ་གཟིགས་བྱུང་བ།
9 ཡེ་ཤུ འི་ཐོག་ནས་སྡུག་བསྔལ་དང༌།
རྒྱལ་སྲིད་དང༌།
བཟོད་པའི་ནང་ལ་ཁྱེད་ཚོ་དང་མཉམ་དུ་འགྲོགས་པའི་སྤུན་ཟླ་ཡོ་ཧ་ནན ་ང་ནི།
དཀོན་མཆོག་གི་བཀའ ་དང་ཡེ་ཤུ་ལ་དཔང་པོ་བྱེད་པའི་རྐྱེན་གྱིས་པད་མོ ་ཞེས་ཟེར་བའི་གླིང་ཕྲན་ལ་ཡོད་པ་ཡིན།
10 གཙོ་བོ འི་ཉིན་མོར་ང་དཀོན་མཆོག ་གི་དམ་པའི་ཐུགས་ཉིད ་ཀྱི་དབང་འོག་ཏུ་ངའི་རྒྱབ་ལ་དུང་ཆེན་གྱི་སྒྲ་དང་འདྲ་བའི་གསུང་སྐད་ཆེན་པོ་ཞིག་ཐོས།
11 དེས་“ཁྱོད་ཀྱིས་གང་མཐོང་བ་དེ་དེབ་ལ་བྲིས་ནས་གྲོང་ཁྱེར་ཨེ་ཕེ་སུ ་དང༌།
སི་མིར་ནཱ །
པེར་ག་མོ །
ཐི་ཡ་ཏི་རཱ །
སར་དཱི །
ཕི་ལ་དེལ་ཕི་ཡཱ །
ལའོ་ཌི་ཀེ་ཡཱ ་བཅས་ཀྱི་ཆོས་ཚོགས་བདུན་པོ་ལ་སྐུར་ཅིག་”ཅེས་གསུངས།
12 ང་ལ་བཀའ་མོལ་གསུང་མཁན་གྱི་ཕྱོགས་སུ་ཕྱིར་བསྐོར་ཏེ།
ངས་གསེར་གྱི་སྟེགས་བུ་བདུན་དང༌།
13 དེ་ཚོའི་དཀྱིལ་ལ་མིའི་གཟུགས་དང་ལྡན་པ་སྟེ།
ཞབས་ལ་ཐུག་པའི་ན་བཟའ་དང༌།
སྐུ་བྲང་ལ་གསེར་གྱི་སྐུ་རས་བཞེས་པ་ཞིག་མཐོང༌།
14 ཁོང་གི་དབུ་དང་དབུ་སྐྲ་ནི་བལ་དཀར་པོའམ་གངས་ལྟར་དཀར་བ་དང༌།
སྤྱན་ནི་མེ་ལྕེ་དང་འདྲ་བ་ཡིན།
15 ཁོང་གི་ཞབས་ནི་མེ་ཐབ་ནང་ལྷད་བཏོན་བཞིན་པའི་ལི་དང་འདྲ་བ་ཡིན་པ་དང༌།
ཁོང་གི་གསུང་སྐད་ནི་རྦབ་ཆུ་ཆེན་པོ་ཞིག་གི་འུར་སྒྲ་དང་འདྲ་བ་ཡིན།
16 ཁོང་གི་ཕྱག་གཡས་སུ་སྐར་མ་བདུན་ཡོད་དེ།
ཁོང་གི་ཞལ་ནས་རལ་གྲི་ཁ་གཉིས་མ་རྣོ་པོ་ཞིག་ཐོན་པ་དང༌།
ཞལ་གདོང་ནི་ཉི་མའི་གཟི་བརྗིད་ཆེན་པོ་ཞིག་དང་འདྲ་བ་ཡིན།
17 ཁོང་མཇལ་ནས་ང་གཤིན་པོ་ཞིག་དང་འདྲ་བར་ཁོང་གི་ཞབས་དྲུང་དུ་འགྱེལ།
ཁོང་གིས་ཕྱག་གཡས་པ་ངའི་ལུས་ལ་བཞག་ནས་“མ་འཇིགས་ཤིག
ང་ནི་ཐོག་མ་དང་མཐའ་མ་ཡིན་པ་དང༌།
18 གསོན་པོ་དེ་ཡིན།
སྔར་ང་ཤི་ཡང༌།
ལྟོས་ཤིག
ད་ང་རྟག་ཏུ་གསོན་པོར་གནས།
འཆི་བ་དང་གཤིན་ཁམས་ཀྱི་ལྡེ་མིག་ང་ལ་ཡོད།
19 དེའི་ཕྱིར་ཁྱོད་ཀྱིས་གང་མཐོང་བ་དང༌།
ད་ལྟ་ཡོད་པ་དང༌།
རྗེས་སུ་འབྱུང་བ་རྣམས་ཡི་གེར་བྲིས་ཤིག
20 ཁྱོད་ཀྱིས་ངའི་ལག་གཡས་སུ་མཐོང་བའི་སྐར་མ་བདུན་པོའི་གསང་བ་དང༌།
གསེར་གྱི་སྟེགས་བུ་བདུན་ནི་དོན་འདི་ལྟར་ཏེ།
སྐར་མ་བདུན་པོ་ནི་ཆོས་ཚོགས་བདུན་གྱི་ཕོ་ཉ་ཡིན་ཞིང༌།
སྟེགས་བུ་བདུན་པོ་ནི་ཆོས་ཚོགས་བདུན་པོ་ཡིན་ནོ། །”