ངོ་སྤྲོད།

དྲིས་ལན། བཀོལ་སྤྱོད་མཉེན་ཆས།

ལན། སྟོན་པ་ཡེ་ཤུ་མཱ་ཤི་ཀ་ནི་དཀོན་མཆོག་གི་སྲས་དང་མི་རིགས་ཐམས་ཅད་ཀྱི་སྐྱབས་མགོན་ཡིན་ཏེ། ལོ་ངོ་ཉིས་སྟོང་གི་སྔོན་དུ་ཡི་སི་ར་ཨེལ་ཞེས་ཟེར་བའི་ཡུལ་དུ་སྐུ་འཁྲུངས། ཁོང་ནི་ཡ་ཧུ་དཱ་མི་རིགས་ཀྱི་ཡོངས་སུ་གྲགས་པའི་སྟོན་པ་ཞིག་ཡིན། ཁོང་ལ་ཉེ་གནས་བཅུ་གཉིས་དང་རྗེས་སུ་འབྲང་མཁན་མང་པོ་ཡོད། ཁོ་ཚོའི་ནང་ནས་མི་ཁ་ཤས་ཀྱིས་ཁོང་གི་གསུང་ནི་ཞལ་ཆད་གསར་པ་ཞེས་ཟེར་བའི་དཔེ་དེབ་ཏུ་བཀོད། སྟོན་པ་ཡེ་ཤུས་དགེ་བ་གསོག་པ་དང༌། ཆོས་ཀྱི་ཆོ་ག མིའི་ལུགས་སྲོལ་སོགས་དཀོན་མཆོག་གི་སྤྱན་སྔར་ཐར་པ་འཐོབ་པའི་ཕྱིར་ཕན་མེད་ཡིན་པར་གསུངས། ཁོང་གི་གསུང་ལྟར་དཀོན་མཆོག་ལ་བསྙེན་བཀུར་ཞུ་འདོད་མཁན་གྱིས་བྱ་བ་དེ་རྣམས་ཀྱི་ཚབ་ལ་གཙོ་བོ་དཀོན་མཆོག་ལ་བློ་གཅིག་སེམས་གཅིག་དང་ནུས་པ་ཅི་ཡོད་ཀྱིས་བརྩེ་བར་བཟུང་སྟེ། རང་ལས་གཞན་རྣམས་ལ་བྱམས་པ་བྱེད་དགོས། སྟོན་པ་ཡེ་ཤུས་གལ་ཏེ་མི་ཞིག་གིས་རང་ཉིད་སྡིག་ཉེས་ཅན་ཡིན་པར་ཁས་ལེན་བྱས་ཏེ་སྤྱོད་པ་ངན་པ་རྣམས་སྤངས་ནས་སེམས་བསྒྱུར་ན། དཀོན་མཆོག་གིས་ཁོའི་སྡིག་ཉེས་སེལ་ངེས་ཡིན་པར་གསུངས། ཡེ་ཤུ་ལ་དད་པ་རྣམས་ཞི་བདེ་དང་དགའ་སྤྲོའི་ངང་ནས་དཀོན་མཆོག་དང་དུས་གཏན་དུ་གནས་པར་འགྱུར་ངེས་ཡིན། འོན་ཀྱང་ཁོང་གིས་དཀོན་མཆོག་ལ་ངོ་རྒོལ་བྱེད་མཁན་ཐམས་ཅད་དཀོན་མཆོག་དང་ཁ་བྲལ་ཏེ་དམྱལ་ཁམས་སུ་དུས་རྟག་ཏུ་གནས་དགོས་པར་གསུངས། དེ་ལྟར་གསུངས་པའི་དབང་ཆ་ཡོད་པ་མཚོན་པའི་ཕྱིར་ཁོང་གིས་ངོ་མཚར་ཅན་གྱི་མཛད་པ་མང་པོ་བསྟན། དཔེར་ན་དཀོན་མཆོག་གི་ནུས་མཐུའི་སྒོ་ནས་ཁོང་གིས་ནད་རིགས་མི་འདྲ་བའི་ནད་པ་མང་པོ་བཅོས་གནང་བ་དང༌། གདོན་འདྲེ་མང་པོ་བསྐྲད་པ། གཤིན་པོ་རྣམས་འཆི་བ་ལས་བསླངས་པ་ལ་སོགས་པའི་འཕྲིན་ལས་མཛད།