1 ཕོར་པ་བདུན་ཡོད་པའི་ཕོ་ཉ་བདུན་ལས་གཅིག་ངའི་རྩར་ཡོང་ནས་ང་ལ་“འདིར་ཤོག་ལ།

ཆུ་མང་པོའི་སྟེང་ལ་སྡོད་པའི་སྨད་འཚོང་མ་ཆེན་མོའི་ཉེས་ཆད་ཁྱོད་ལ་སྟོན་པར་བྱ།

2 ཁོ་མོ་དང་མཉམ་དུ་ས་གཞིའི་རྒྱལ་པོ་རྣམས་ཀྱིས་ལོག་གཡེམ་བྱས།

ཁོ་མོའི་ལོག་གཡེམ་གྱི་རྒུན་ཆང་གིས་ས་གཞི་ལ་སྡོད་པ་རྣམས་ར་བཟི་བར་གྱུར་”ཞེས་གསུངས།

3 དམ་པའི་ཐུགས་ཉིད་ཀྱི་དབང་འོག་ཏུ་ཕོ་ཉ་དེས་ང་དབེན་གནས་ཤིག་ལ་འཁྲིད་ཅིང༌།

གཅན་གཟན་དམར་པོ་ལ་སྡོད་པའི་བུད་མེད་མཐོང༌།

མགོ་བདུན་དང་རྭ་ཅོ་བཅུ་ཡོད་པའི་གཅན་གཟན་དེ་ནི་དཀོན་མཆོག་ལ་སྐུར་བ་འདེབས་པའི་མིང་གིས་ཁེངས།

4 བུད་མེད་དེས་མདོག་དམར་པོ་དང་རྒྱ་སྨུག་གི་གོས་གྱོན་ཏེ།

གསེར་དང༌།

ནོར་བུ་རིན་པོ་ཆེ་དང༌།

མུ་ཏིག་རྣམས་ཀྱིས་བརྒྱན།

ཁོ་མོའི་ལག་ཏུ་རང་གི་ལོག་གཡེམ་གྱི་དྲི་མ་དང་ལོག་གཡེམ་གྱི་རྫས་མི་གཙང་བ་རྣམས་ཀྱིས་གང་བའི་གསེར་གྱི་ཕོར་པ་ཞིག་ཡོད།

5 ཁོ་མོའི་དཔྲལ་བ་ལ།

སྦ་བི་ལོན་གྲོང་ཁྱེར་ཆེན་མོ།

སྨད་འཚོང་མ་རྣམས་དང་ས་སྟེང་མི་གཙང་བ་རྣམས་ཀྱི་ཨ་མ་ཞེས་པའི་གསང་བའི་མིང་བྲིས་ཡོད།

6 བུད་མེད་དེ་དཀོན་མཆོག་གི་མི་རྣམས་ཀྱི་ཁྲག་དང༌།

ཡེ་ཤུའི་དཔང་པོའི་ཁྲག་གིས་བཟི་ཡོད་པ་ངས་མཐོང༌།

ཁོ་མོ་མཐོང་ནས་ཡ་མཚན་ཆེན་པོ་སྐྱེས།

7 ཕོ་ཉ་དེས་ང་ལ་“ཅིའི་ཕྱིར་ཡ་མཚན་པོར་གྱུར།

བུད་མེད་དེ་དང༌།

ཁོ་མོ་འཁུར་བའི་མགོ་བདུན་དང་རྭ་ཅོ་བཅུ་ཡོད་པའི་གཅན་གཟན་གྱི་གསང་བ་ཁྱོད་ལ་གསལ་བཤད་བྱེད་པར་བྱ།

8 ཁྱོད་ཀྱིས་མཐོང་བའི་གཅན་གཟན་ནི་སྔར་ཡོད་པ་དང༌།

ད་ལྟ་མེད་པ།

རྗེས་སུ་གཏིང་མཐའ་མེད་པའི་དོང་ནས་འཐོན་ཞིང༌།

འཇིག་པར་འགྲོ་བར་འགྱུར།

ས་གཞི་ལ་སྡོད་མཁན་ཏེ།

འཇིག་རྟེན་གསར་དུ་བཀོད་པ་ནས་དཔག་ཏུ་མེད་པའི་ཚེའི་མདོ་ལ་མིང་མ་འཁོད་པ་རྣམས་ཀྱིས་གཅན་གཟན་དེ་སྔར་ཡོད་པ།

ད་ལྟ་མེད་པ།

རྗེས་སུ་འོང་བ་མཐོང་ནས་ཡ་མཚན་དུ་འགྱུར།

9 དོན་དེ་རྟོགས་པར་ཤེས་རབ་དགོས།

མགོ་བདུན་པོ་ནི་བུད་མེད་བསྡད་ཡོད་པའི་རི་བདུན་དང༌།

རྒྱལ་པོ་བདུན་མཚོན།

10 རྒྱལ་པོ་དེ་རྣམས་ལས་རྒྱལ་པོ་ལྔ་ཤི་ཟིན།

གཅིག་ད་ལྟ་ཡོད།

གཞན་པ་དེ་ད་དུང་མ་འོང༌།

འོང་ནས་དུས་ཐུང་ངུ་ལ་ངེས་པར་གནས་དགོས།

11 སྔར་ཡོད་པ་དང༌།

ད་ལྟ་མེད་པའི་གཅན་གཟན་ནི་རྒྱལ་པོ་བརྒྱད་པ་ཡིན་ཡང༌།

རྒྱལ་པོ་བདུན་པོ་ལྟར་ཡིན་དེ་འཇིག་པར་འགྲོ་བར་འགྱུར།

12 ཁྱོད་ཀྱི་མཐོང་བའི་རྭ་ཅོ་བཅུ་ནི་རྒྱལ་ཁམས་ད་དུང་མ་འཐོབ་པའི་རྒྱལ་པོ་བཅུ་ཡིན་ཏེ།

ཁོ་ཚོ་ལ་གཅན་གཟན་དང་བཅས་པར་ཆུ་ཚོད་གཅིག་གི་བར་དུ་རྒྱལ་པོའི་དབང་འཐོབ་པར་འགྱུར།

13 ཁོ་རྣམས་སེམས་མཐུན་ནས་རང་གི་དབང་གཅན་གཟན་ལ་གཏོད་པར་འགྱུར།

14 ཁོ་ཚོས་ལུ་གུ་ལ་དམག་འདྲེན་ཡང༌།

ལུ་གུས་རྒྱལ་པོ་དེ་རྣམས་ལས་རྒྱལ་བར་འགྱུར།

གང་ལགས་ཤེ་ན།

ལུ་གུ་ཁོང་ནི་གཙོ་བོ་རྣམས་ཀྱི་གཙོ་བོ་དང་རྒྱལ་པོ་རྣམས་ཀྱི་རྒྱལ་པོ་ཡིན་པས།

ཁོང་དང་མཉམ་དུ་ཡོད་པ་རྣམས་ཏེ་བོས་པ་དང༌།

བདམས་པ་དང༌།

བློ་གཏད་ཆོག་པ་ཡིན་པས་སོ་”ཞེས་གསུངས།

15 དེ་ནས་ཕོ་ཉ་དེས་ང་ལ་“ཁྱོད་ཀྱིས་མཐོང་བའི་སྨད་འཚོང་མ་སྡོད་པའི་ཆུ་རྣམས་ཀྱིས་མི་རིགས་དང༌།

མང་ཚོགས།

རྒྱལ་ཁབ།

སྐད་རིགས་མཚོན།

16 ཡང་ཁྱོད་ཀྱིས་མཐོང་བའི་རྭ་ཅོ་བཅུ་དང་གཅན་གཟན་གྱིས་སྨད་འཚོང་མ་ལ་སྡང་ནས་ཁོ་མོའི་རྒྱུ་ནོར་འཕྲོག་སྟེ་གོས་མེད་པར་བྱེད།

ཁོ་མོའི་ཤ་ཟ་ཞིང་མེ་ཡིས་སྲེག་པར་འགྱུར།

17 དཀོན་མཆོག་གི་དགོངས་པ་མ་སྒྲུབ་པའི་བར་དུ་རྒྱལ་པོ་བཅུ་སེམས་གཅིག་ཏུ་གྱུར་ནས་རང་གི་རྒྱལ་ཁམས་གཅན་གཟན་ལ་གཏོད་དུ་བཅུག་པའི་སྒོ་ནས་དཀོན་མཆོག་གིས་དེ་རྣམས་ལ་རང་གི་དོན་སྒྲུབ་ཏུ་འཇུག་པར་མཛད།

18 ཁྱོད་ཀྱིས་མཐོང་བའི་བུད་མེད་དེས་ས་གཞིའི་རྒྱལ་པོ་རྣམས་ལ་དབང་སྒྱུར་བའི་གྲོང་ཁྱེར་ཆེན་མོ་མཚོན་”ཞེས་གསུངས་སོ། །