རྩོམ་པ་པོ། སྐུ་ཚབ་པའུ་ལུ།

རྩོམ་དུས། སྤྱི་ལོ་ 55-57 བར་ཙམ་ལ་འཕྲིན་ཡིག་འདི་བྲིས། (ལོ་རྒྱུས་དོན་ཆེན་རེའུ་མིག་ལ་གཟིགས་)

རྩོམ་རིག་གི་རྣམ་གྲངས། འཕྲིན་ཡིག

ཐོག་མའི་ཀློག་མཁན། ཀོ་རིན་ཐུ་གྲོང་ཁྱེར་ལ་སྡོད་མཁན་མཱ་ཤི་ཀ་པ་རྣམས། (གནའ་རབས་ཀྱི་ཀོ་རིན་ཐུ་གྲོང་ཁྱེར་གྱི་གནའ་ཤུལ་ནི་དེང་སྐབས་ཀྱི་གྷི་རིག་རྒྱལ་ཁབ་ཀྱི་ལྷོ་ཕྱོགས་སུ་ཡོད་)

ནང་དོན་གཙོ་བོ། སྐུ་ཚབ་པའུ་ལུ་ཡིས་ཀོ་རིན་ཐུ་གྲོང་ཁྱེར་གྱི་ཆོས་ཚོགས་བཙུགས་ཀྱང༌། དེར་ཡོད་པའི་མཱ་ཤི་ཀ་པ་ཁ་ཤས་ཀྱིས་དཀོན་མཆོག་གི་བཀའ་ལ་མ་ཉན་པར་གྱུར། ཁོང་གིས་བཀའ་ལ་མ་ཉན་པ་རྣམས་ལ་བཀའ་བཀྱོན་གཏོང་བའི་ཆེད་དུ་འཕྲིན་ཡིག་ཅིག་བྲིས་ནས། ཁོ་ཚོའི་གནས་ཚུལ་གང་ཡིན་པ་དཔྱད་པའི་ཕྱིར་སྐུ་ཚབ་པའུ་ལུ་ཡིས་ཁོང་གི་ལས་རོགས་ཐེ་ཏུ་ཀོ་རིན་ཐུ་གྲོང་ཁྱེར་ལ་བཏང༌། ཐེ་ཏུ་སྐུ་ཚབ་པའུ་ལུའི་སར་ལོག་སྐབས་ཁོས་སྐུ་ཚབ་པའུ་ལུ་ལ་ཀོ་རིན་ཐུ་པ་རྣམས་ཀྱི་ནང་ནས་མི་ཁ་ཤས་ཀྱིས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་ཡང༌། ཁ་ཤས་ཀྱིས་སྐུ་ཚབ་པའུ་ལུ་ལ་ཁོང་ཁྲོ་སྐྱེས་ཏེ་ཁོང་གི་དབང་ཆ་དོར་བར་བཤད། མི་ཁ་ཤས་ཀྱི་སྤྱོད་པ་ངན་པ་སྤངས་པ་ཐོས་ནས་སྐུ་ཚབ་པའུ་ལུ་སེམས་དགའ་བར་གྱུར་ཡང༌། ཁོང་གི་དབང་ཆ་དོར་མཁན་གྱི་སྐོར་སེམས་ཁྲལ་ཡོད། ཁོང་གིས་ཁོ་རྣམས་ལ་དད་པའི་ཐོག་ནས་བརྩེ་བར་འཛིན་པ་དང༌། ཁོ་རྣམས་དང་སྡུམ་པར་མ་འགྱུར་བའི་བར་དུ་ཁོང་སེམས་ཤིན་ཏུ་འཚབས་པ་ཤོད་པའི་ཆེད་དུ་འཕྲིན་ཡིག་འདི་བྲིས། ཁོང་གིས་བྲིས་པ་ལྟར་“མི་རྣམས་ཀྱི་སྡིག་ཉེས་མི་རྩི་བར། དཀོན་མཆོག་གིས་མཱ་ཤི་ཀའི་སྒོ་ནས་འཇིག་རྟེན་པ་ཁོང་རང་དང་བར་སྡུམ་མཛད་ཅིང༌། སྡུམ་པའི་འཕྲིན་དེ་ང་ཚོ་ལ་གཏད་བྱུང་”ཞེས་གསུངས།