རྩོམ་པ་པོ། ཆོས་ཤོད་མཁན་ལུ་ཀཱ ཁོང་ནི་ལུ་ཀཱ་ཡིས་བྲིས་པའི་འཕྲིན་བཟང་གི་རྩོམ་པ་པོ་དང༌། སྨན་པ་ཞིག སྐུ་ཚབ་པའུ་ལུའི་གྲོགས་པོ་བཅས་ཡིན།

རྩོམ་དུས། སྤྱི་ལོའི་དུས་རབས་དང་པོའི་དུས་དཀྱིལ་ཙམ་གྱི་རྗེས་སུ་བྲིས། (ལོ་རྒྱུས་དོན་ཆེན་རེའུ་མིག་ལ་གཟིགས་)

རྩོམ་རིག་གི་རྣམ་གྲངས། ལོ་རྒྱུས།

ཐོག་མའི་ཀློག་མཁན། ཐེ་ཨོ་ཕི་ལུ་དང་མཱ་ཤི་ཀ་པ་གཞན་རྣམས།

ནང་དོན་གཙོ་བོ། གཙོ་བོ་ཡེ་ཤུ་དཀོན་མཆོག་གི་ཞིང་ཁམས་སུ་ཡར་འཕགས་པའི་སྐབས་སུ་ཁོང་གིས་ཉེ་གནས་རྣམས་ལ་“ཡེ་རུ་ཤ་ལེམ་དང༌། ཡ་ཧུ་དཱ་ཡུལ་ཡོངས། ས་མར་ཡཱ་ཡུལ། ས་གཞི་མཐའ་མའི་བར་དུ་ངའི་དཔང་པོ་ཡིན་པར་འགྱུར་”ཞེས་གསུངས། བཀའ་དེ་ལ་ཉན་ཏེ་ཁོང་གི་ཉེ་གནས་དང་དད་ལྡན་གཞན་རྣམས་མི་རིགས་ཐམས་ཅད་ལ་འཕྲིན་བཟང་སྒྲོག་པའི་ཆེད་དུ་ཕྱིར་ཕེབས། ཡི་སི་ར་ཨེལ་གྱི་རྒྱལ་ས་ཡེ་རུ་ཤ་ལེམ་ནས་བཟུང་སྟེ་ཁོང་ཚོས་ས་དབུས་རྒྱ་མཚོའི་འགྲམ་ལ་ཆགས་པའི་རྒྱལ་ཁབ་ལ་ཆོས་ཚོགས་བཙུགས། ཆོས་ཤོད་མཁན་ལུ་ཀཱ་ནི་གང་བྱུང་བ་དེའི་མིག་གིས་མཐོང་མཁན་ཡིན་པས། སྤྱི་ལོའི་དུས་རབས་དང་པོའི་ཆོས་ཚོགས་ཀྱི་ལོ་རྒྱུས་འདི་བྲིས་ནས་ཐེ་ཨོ་ཕི་ལུ་ཞེས་ཟེར་མཁན་ལ་བཏང༌།